Zogal Day nia, MP Club, South Avenue mun a, UZO President Delhi Branch Thugenna

Tana hing kikhawm u leh naute, tu leh tate, pi leh pute, ZSP President leh Secretary leh ka seppiteng aw.

Zogal-Zogal Day nikhuo tam banga I manthei ziehun Pasien ka phat masa hi.

ZSP lamkaite’n tam banga ngaikhawtaha active part nang lah ziehun UZO Delhi Branch tang leh Zou mipiteng min in patatna sangpen ka’g tut/pie uh hi.

Zogal Day pen Tuitawgal zieha I Pu I paet na kiphinna uh nikhuo, a na sini uh nikhuo ahia, eita’ dingin pen kipahna nikhuo ahi sih a, dana nikhuo ahizaw hi, chi khuh I thei chiet dingun ka’ng talang hi.

Tuitawgal sat dingin I pu I pate uh, 1917 kum apatin 1919 kum sungtengin ganta mat bangin a khuo a khuo ah, I pu I pate na kiman uh hhi. Tuachiin, 1917-1919 sungin Mangkangte khutnei ah gimthuohna na tuoh u’a, genthei liengvaina a na tuo uh, theizingna nikhuo khuh Zogal Day ahi. Zogal Day khuh eite dinga Lusunna nikhuo a melchi chiet dingin ka’ng theisah hi.

Eite’n Zogal I chipen uh khu tangthu gelsiemte’n Kuki Uprising ahilouleh Kuki Rebellion ahilouleh Kuki War of Independence chiin na khum uh hi. Tunidongin, Manipur gamah Kuki Uprising chiin a kithei gige hi.

Zogal pen kei na zahdan leh ka na theidan hichi ahi. Zou khuo khat a innsuongpa a’ng kikaidoh chiengin I Pusa I Pasa biehna pen a na buoi mama a, khum Lawki Pusa Pasa biehna hunah koi in Pu Gau Pa Gau a sam tadiei, khuleh a louta diei? Koi in a’ng makaipi ta diei? Chiin na lunggim na singim mama uh hi. Tuachia lunggimtaha a’ng op chiengun, Zou papite a na beidong mama uh hi. Innsuongpa pen Tuitawgal kaiding a na ngaisut chiengun, a tuotmaw keei uh hi. Va kuonta mawh uh leh, sina tuoh ngeingei ding uh hi chiin na gingta uh hi. Tua ziehin, Zou khuo pawlkhat na kiphin uh hi.

Zou nam pumpi thakhat a, kihoukhawm masa diemdiem a, na kiphin khawm uh hilou dingin ka gingta hi. Khumlaiin, Mangkangte’n a khuo a khuo a Labour Corps sepai dinga pasal thahatte a’ng khop bep un, Zouta kuol zil bang na killing hi. Bang kisuoh mawh ding ahiei chia a’ng kikupkup uh leh, Mangkangte dou ding ahi, chiin a na kithukim khawm dan u’a, gen pawl khat a om a, mi pawlkhat gendan kia leuleu ahileh, a khuokhuo a mite a matdan toh kizuia kiphinna na pieng giap ahibou hi, chi pawl zong a om hi. Bangteng hitaleh zong, historical record lui tahtah muthei ding a op lou ziehin, Confirm bawl hasa mama hi. Hinanleh, tangthu gielsiem pawlkhat gieldan in pen Zou hausateng na kikumkhawm un, Mangkangte a na dou uh hi, chiin na giel uh hi. Tam thu toh kisai in, tangthu gielsiemte’n a na khumlutna uh mun themkhat ka’ng simdoh ding hi.

1926 kum Pu Hrangsuaka leh Pu Dawnthawma tegel Kristian bulletin sungah Zo kichite’n

Mangkangte na dou uh hi, chiin na khumlut uh hi.

Ngulkhohua Lhungdim leh Dr. Kamkhenthang tegel in zong Zougal satthu na giel uh hi.

Chin Hills ah Pu Mangzakhup in Kuki Rebellion laiin Mangkangte na hu kha hi, chiin DC, Falam in na gielkha hi. Khuzieha, bangchidan a ama’n Mangkangte patatna a na ngathei ahiei? Chipen suikhiet dingin ahoi hi.

Tualeh, Pu Dominic Khammeng in 1993 laiin Tuitawgal Medal khat ei na ensah hi. Tuami Medal pen a vom sim ahia, “ka pu in a na san ahi” chiin ei hil hi. Tuachi ahitah leh, Zoute zousie’n Zogal a na sat uh ama? chi khu thudohna lienpi a om hi. Tam thu zong suikhiet dingin a hoi hi.

Tulaia, laigiel pawlkhat in khumpa khumte lamkai chi ma uh leh zong, bangma techi dihtah muthei mukhiet dinga a op lou ziehin genkipthei a om in a kimu sih hi.

Tuni Zogal Day pen Inn lamah zong thupitahin Zogal Hall ah nam zousie kimphiel in a kibawl chi thu zong inn lama patsain ka nga hi.

Pu Ginsuonhau in lailam pilna siemna sangtahpi nei sih ma nanleh zong I Nam ngainatna in silhoi tampi atongdohta a, a mi a sa tampite a na hu/panpi zouta chi zong I thei chiet uh hi. Tunia, I MLA nei leh I MLA luite, I Minister luite na keplou a na puo manlou uh, I Zogal Hall uh, Pu GS Haopu in thupitaha ahing lamdoh pen thupi I sa u’a, khuziehin, ama pen UZO Delhi Branch min a, patat lou theilou tangai phawmaw ahi, ama khu Zoute ngaina vawt khat in tangthu bu sungah I sim den ding uh, ka gingta hi. Khum ziehin, Pu Ginsuonhau ka’ng chi chiengin Kalaisai I chi ding uh hi, thumveitah. Khuchiin, Kalaisai, thumveitah mipite’n a sam uh hi.

Zou ka hi, Zou ka it ka ngai I chi u’a ahileh, tuniin Zogal Hall kilamzouta mananleh zong sum leh pai pen na dongtou zel un, chia bulpi lamte’n a’ng thuhlah ziehun, Delhi a Zoutate UZO sumdon, Zogal Hall sumdon pen dontou ding ahi.

Ei Delhi UZO te’n zong kum khat leh a kim val peizousa hun ah, Zogal Hall lamna dingin APPEAL letter Zokuomthawn leh Zolengthe , Laihawm tungtawnin na kihil zel hi.

Tuin sum pen mi phabeppi khat in a’ng tuohta a, hinanleh ei Delhi a omteng in tuoh kimchiet va ui, chiin hun a kibelap na lai hi.

Zogal Hall lamna ah, mimal khat in TEHLEI khat chiet tuoding chia, I zungpite’n a’ng gen ziehin, koipou gelsiem in, I kingapza chiet khu Zogal Hall lamna dingin tuoh chiet va ui, chiin ka’ng hanthawn uh hi. Sumdon paidon pen hi teitei heh, dong teitei un, kichithei zong ahi sih a, ei Delhi a omte pen innlamte ettontahte hiva ui, chiin ka’ng chiel u’a, ka’ng theisah sawnsawn uh hi.

Atawpna dingin, a bailam zaw leh a centre zaw chiin, mite kikhopna bailam chiin, ka requestna dungzuiin, Lutheran Church phalna toh, kum tampi ka na sih leh ka na bawlbawl Zou-English-Hindi Kizilna Laibu pen nikhuo March 13 niin MELC Delhi kikhop leh biehinn kai sungin Pasien min suongin Prof. P.K Pandey in honkhietna aneia, Pastor Kamsuonlal in Pasien kungah latna na nei hi. Tami Laibu pen Delhi leh India khopi tuomtuom a om ei singtangmite dinga ka bawl ahia, Nasemte, Sangnaupangte, Pasien thugente dinga ka bawl ahi. Adei a opleh, bangchih laipou a, Munirka leh ka inn a, muthei gige ahi.

Tami hun hampha ka nga ziehin, kipah ing.

UZO damsawt hen, ZSP damsau hen.